இதுவரை இல்லாத அளவில் சிரஞ்சீவிக்கு 126 அடி உயர கட் அவுட்!

ஹைதராபாத்: சிவா இயக்கத்தில், அஜித், ஸ்ருதிஹாசன், லட்சுமி மேனன் உட்படப் பலர் நடித்து 2015-ம் ஆண்டு வெளியான படம், ‘வேதாளம்’. இந்தப் படம் தெலுங்கில் ‘போலா சங்கர்’ என்ற பெயரில் ரீமேக் ஆகியுள்ளது. சிரஞ்சீவி ஹீரோவாக நடித்துள்ள இந்தப் படத்தில் தமன்னா அவர் ஜோடியாகவும் கீர்த்தி சுரேஷ் தங்கையாகவும் நடித்துள்ளனர். மெஹர் ரமேஷ் இயக்கியுள்ள இப்படம் ஆகஸ்ட் 11-ம் தேதி வெளியாக உள்ளது. ஆக்‌ஷனுக்கு முக்கியத்துவம் கொடுத்து உருவாகியுள்ள இந்தப் படத்துக்குத் தெலுங்கில் எதிர்பார்ப்பு அதிகரித்துள்ளது.

இந்நிலையில் இந்தப் படத்துக்காக, இதுவரை இல்லாத அளவுக்கு 126 அடி உயர சிரஞ்சீவியின் கட் அவுட் வைக்கப்பட்டுள்ளது. இவ்வளவு உயரமாக தெலுங்கு திரையுலகில் யாருக்கும் கட் அவுட் வைக்கவில்லை. ஹைதராபாத் - விஜயவாடா தேசிய நெடுஞ்சாலையில் உள்ள சூர்யாபேட்டில் உள்ள உணவகத்தில் இந்த கட் அவுட் வைக்கப்பட்டுள்ளது. இதைப் பொதுமக்கள் ஆச்சரியத்துடன் பார்த்து செல்கின்றனர்.

from இந்து தமிழ் திசை : News in Tamil, Latest Tamil News India & World, Cinema, Hindu Tamil Thisai Daily Newspaper Online: தமிழால் இணைவோம்