‘கான்ட்ராக்டர் நேசமணி’ முதல் விஜய்க்கு ‘கம்பேக்’ வரை: இயக்குநர் சித்திக் நினைவலைகள்

தமிழ் சினிமா வரலாற்றில் சில நகைச்சுவை கதாபாத்திரங்கள் எத்தனை ஆண்டுகள் ஆனாலும் ரசிகர்கள் மனதில் நீங்காமல் என்றென்றும் தங்கிவிடும். அந்த படமே மறக்கப்பட்டாலும் கூட அந்த படத்தில் இடம்பெற்ற நகைச்சுவைக் காட்சிகள் தொடர்ந்து நினைக்கூரப்படும். அந்த கதாபாத்திரங்கள் சமூக வலைதளங்களில் மீம்ஸ் வழியே உலவிக் கொண்டிருக்கும். அப்படி ஒரு கதாபாத்திரம்தான் ‘ஃப்ரெண்ட்ஸ்’ படத்தில் இடம்பெற்ற ‘கான்ட்ராக்டர் நேசமணி’. நகைச்சுவை காட்சிகளுக்காகவே இரண்டு தசாப்தங்களுக்குப் பிறகும் பேசப்படும் ‘ஃப்ரெண்ட்ஸ்’ படத்தை இயக்கிய சித்திக் உடல்நலக்குறைவால் நேற்று (ஆகஸ்ட் 08) காலமானார்.

80களின் தொடக்கத்தில் கேரளாவில் பிரபலமாக இருந்த கொச்சி கலாபவன் கலைக் குழுவில் மிமிக்ரி கலைஞராக இடம்பெற்றிருந்தார் சித்திக். அதே குழுவில் இருந்த மற்றொரு கலைஞர் லால். மேடையில் இருவரது திறமையையும் கண்டு வியந்த இயக்குநர் ஃபாசில் இருவரையும் தன்னுடைய உதவியாளர்களாக சேர்த்துக் கொண்டார். இதுவே மலையாள சினிமாவில் பெரும் வெற்றிப் படங்களை தந்த சித்திக் - லால் கூட்டணிக்கு அடித்தளம் அமைத்தது.

from இந்து தமிழ் திசை : News in Tamil, Latest Tamil News India & World, Cinema, Hindu Tamil Thisai Daily Newspaper Online: தமிழால் இணைவோம்