Smart Phone-ல் அந்தச் சிறு துளை எதற்கு? | இது தெரியாமப் போச்சே?! 1
நாம் பயன்படுத்தும் ஸ்மார்ட்போன்களின் கீழ்ப்பகுதியில் ஊசி முனை அளவிலான ஒரு சிறிய துளை இருப்பதைக் கவனித்திருப்பீர்கள். சிலர் இதை மைக் என்றோ, Reset பட்டன் என்றோ நினைத்திருக்கக் கூடும். ஆனால், அதன் உண்மையான பெயர் Noise-canceling microphone.
போனில் பேசும்போது, வழக்கமான மைக்ரோபோன் நமது குரலைப் பதிவு செய்யும். அதேநேரம், இந்தச் சிறிய துளையில் உள்ள இரண்டாவது மைக்ரோபோன், நம்மைச் சுற்றியுள்ள இரைச்சல்களை (உதாரணமாக: வாகனங்களின் சத்தம், காற்றின் இரைச்சல், கூட்டத்தின் சலசலப்பு) தனியாக உள்வாங்கும்.
ஸ்மார்ட்போனில் உள்ள தொழில்நுட்பம், இந்த இரண்டு ஒலிகளையும் ஒப்பிட்டுப் பார்த்து, பின்னணி இரைச்சலை மட்டும் வடிகட்டிவிட்டு, நமது குரலை மட்டும் எதிர்தரப்பிற்கு மிகத் தெளிவாகக் கேட்கச் செய்கிறது.
இதனால், நெரிசலான அல்லது சத்தமான இடங்களில் நீங்கள் பேசினாலும், எதிரில் இருப்பவருக்கு உங்கள் குரல் மட்டுமே துல்லியமாகக் கேட்கும். நவீன உயர்ரக ஸ்மார்ட்போன்களில் இந்தச் சிறிய துளைகள் இரண்டு அல்லது மூன்று கூட இருக்கலாம்.
நாம் பேசுவதை உள்வாங்க ஒன்று, சுற்றுப்புறச் சத்தத்தை அளவிட ஒன்று, வீடியோ எடுக்கும்போது திசை சார்ந்த ஒலியை (Directional Audio) துல்லியமாகப் பதிவு செய்ய ஒன்று என இருக்கும்.
பலர் தங்கள் போனுக்கு அழகிய உறை போடுவார்கள். சில மலிவான உறைகள் இந்தச் சிறிய துளைகளை மறைத்துவிடும். அதனால் நீங்கள் பேசும்போது எதிரே இருப்பவருக்கு உங்கள் குரல் கிணற்றுக்குள் இருந்து பேசுவது போல கேட்கும்.
இந்தத் துளை பார்ப்பதற்கு சிம் கார்டை வெளியே எடுக்கும் துளை போலவே இருக்கும். அவசரத்தில் இந்த மைக்ரோபோன் துளைக்குள் குத்திவிட்டால், உள்ளே இருக்கும் மெல்லிய மைக்ரோபோன் சவ்வு கிழிந்துவிடும். அதன் பிறகு உங்கள் போனின் நாய்ஸ் கேன்சலேஷன் வேலை செய்யாது.
from விகடன்
No comments